ޅޮހީން ދަނޑުބިން ދޫކުރުމާ ބެހޭ ޤަވާއިދަށް ހިޔާލު ހުށައެޅުމަށް ހުޅުވާލުން
ޅޮހީގައި ދަންޑުވެރިކަން ކުރުމަށް ބިން ދޫކުރުމުގައި ގެންގުޅެމުން އަންނަ އުސޫލު އަލުން ރިވިއު ކޮށް، އާކުރުމަށް ކައުންސިލުން މަސައްކަތް ކުރަމުންދާތީވެ، މިކަމުގައި އާންމުންގެ ހިޔާލު ކައުންސިލަށް ބޭނުންވެއެވެ. ވީމާ ދަނޑުބިން ދޫކުރުމާއި، ދަނޑުވެރިކަން ކުރުމާ ބެހޭ ޤަވާ ޢިދުގެ ފުރަތަމަ ދެލިކޮޕީ ހިޔާލު ހުށައެޅުމަށްޓަކައި ހިއްސާކޮށްލަމެވެ.
ހިޔާލު ދެއްވުމަށް މިލިންކަށް ފިތާލައްވާ!
- މި ގަވާއިދަށް ޢަމަލުކުރަން ފެށުމަށްފަހު، މި ގަވާއިދާ އެއްގޮތްވާ ގޮތުގެމަތީން ހުއްދަނަގައިގެން މެނުވީ، ރަށުގެ އެއްވެސް ސަރަހައްދެއްގައި ދަނޑުވެރިކަންކުރުމާއި ރުއްގަސް އިންދުމަކީ މަނާކަމެކެވެ.
- މި ގަވާއިދަށް ޢަމަލުކުރަން ފެށުމުގެ ކުރިން ހިނގައިފައިވާ، ނުވަތަ ކޮށްފައިވާ ކަމެއްގެ މައްޗަކަށް މި ގަވާއިދެއް ނުހިގާނެއެވެ. ނަމަވެސް މި ގަވާއިދަށް ޢަމަލުކުރަން ފެށުމަށްފަހު، މި ގަވާއިދުގައި ވަކިކަމެއް ލާޒިމްކޮށްފައިވާނަމަ، އެ ކަމެއް މި ގަވާއިދުގެ ދަށުން ހިންގޭނެއެވެ.
- މި ގަވާއިދުގެ ދަށުން ދަނޑުވެރިކަން ކުރުމަށް ދަނޑުބިން ދޫކުރާނީ މޭވާއާއި، ތަރުކާރީއާއި، ފަލަމަޑީގެ ބާވަތްތައް ހެއްދުމަށެވެ.
ދަނޑުބިން ދޫކުރުން
- ދަނޑުބިން ދޫކުރެވޭނީ ނ.ޅޮހީގައި ރަޖިސްޓަރީވެފައިވާ ރަށްވެހިންގެ ތެރެއިން އުމުރުން 18(އަށާރަ) އަހަރު ފުރިފައިވާ ފަރާތްތަކާއި، ނ.ޅޮހީގައި ދަނޑުވެރިކަމަށް ޚާއްޞަ ކޮށްގެން ރަޖިސްޓަރީކޮށްފައިވާ އަމިއްލަ ފަރުދުންގެ ވިޔަފާރިއާއި، ކުންފުންޏާއި، ޕާޓްނަރޝިޕާއި، ކޯޕަރޭޓިވް ސޮސައިޓީތަކާއި، ކުލަބް ޖަމްޢިއްޔާ ޖަމާޢަތްތަކަށެވެ. ކައުންސިލުން ދޫކުރުމަށް ހަމަޖެހިފައިވާ ދަނޑުބިންތަކުގެ ތެރެއިން ދަނޑުބިމަކަށް 1 (އެކެއް) ފަރާތަކަށްވުރެ، ގިނަ ފަރާތުން އެދިފައިވާނަމަ، ބިންދޫކުރާނެ ފަރާތެއް ކަނޑައެޅުމުގައި ތިރީގައި ބަޔާންކޮށްފައިއެވާ ކަންކަމަށް ރިޢާޔަތް ކުރަންވާނެއެވެ.
- މި ގަވާއިދުގެ ދަށުން ދޫކުރާ އެންމެހައި ދަނޑުބިންތައް ހަވާލުކުރާނީ، ދަނޑުބިން ދޫކުރާ ފަރާތާއި ކައުންސިލާ ދެމެދު، ލިޔުމުން ވެވޭ އެއްބަސްވުމެއްގެ ދަށުންނެވެ.
- މީހެއްގެ ނަމުގައި ރަޖިސްޓަރީކޮށްފައިވާ ކުންފުންޏަކުން ނުވަތަ އަމިއްލަ ފަރުދެއްގެ ވިޔަފާރިއަކުން ދަނޑުބިމަށް އެދި ހުށަހަޅައިފި ނަމަ، އެ ފަރާތަކަށް އަމިއްލަ ފަރުދެއްގެ ހައިސިއްޔަތުން ދަނޑުބިމަށް އެދުމުގެ ފުރުޞަތެއް ނޯންނާނެއެވެ.
- އާންމުކޮށް ދޫކުރާ ކޮންމެ ދަނޑުބިމެއް ދޫކުރެވޭނީ އެ ބިމެއް ދޫކުރާ ތާރީޚުން ފެށިގެން ، މީލާދީގޮތުން 2 (ދޭއް) އަހަރު ދުވަހަށެވެ. ނަމަވެސް ދަނޑުވެރިކަން ކުރުމަށް ދިގުމުއްދަތައް ދަނޑުބިން ދޫކުރުމަށް މި ޤަވާއިދު ހުރަހެއް ނާޅައެވެ. ދިގުމުއްދަތަށް ދަބޑުބިން ދޫކުރުމުގައި މުއްދަތު ކަނޑައަޅާނީ، ދަންޑުވެރިކަން ކުރުމަށް ބިން ހޯދުމަށް އެދި ހުށައަޅާ ޕްރޮޕޯސަލް އަށް ރިޢާޔަތް ކުރުމަށް ފަހުއެވެ. މިފަދަ ބިންތައް ކުއްޔަށް ދޫކުރެވޭނެ އެންމެ ދިގު މުއްދަތަކީ 10(ދިހަ) އަހަރެވެ.
- މި ގަވާއިދުގެ ދަށުން އެއްފަރާތަކަށް ދަނޑުބިމެއްގެގޮތުގައި އެންމެ ކުޑަކޮށް ދޫކުރެވޭނީ، 2000 (ދެހާސް) އަކަފޫޓުވެ. ދަނޑުބިމެއްގެގޮތުގައި ދޫކުރެވޭނެ އެންމެ ބޮޑު އަދަދަކީ، 10000 (ދިހަ ހާސް) އަކަފޫޓެވެ. 10000 އަކަފޫޓުގެ ދަނޑުބިން ދޫކުރުމުގައި ނ.ޅޮހީގައި ދަނޑުވެރިކަމަށް ހާއްޞަކޮށްގެން ރަޖިސްޓަރީކޮށްފައިވާ އަމިއްލަ ފަރުދުންގެ ވިޔަފާރި، ކުންފުނި ، ޕާރޓްނަރޝިޕް، ކޯޕަރޭޓިވް ސޮސައިޓީތަކާއި ކުލަބް ޖަމްޢިއްޔާ ޖަމާޢަތްތަކަށް އިސްކަންދެވޭނެއެވެ. މިގޮތުން 10000 އަކަފޫޓްގެ ބިމަށް އެދޭފަރާތްތަކުން، ކައުންސިލުން ދޫކުރާ ދަނޑުބިން ހޯދުމަށް އެދި ހުށައަޅާ ފޯރމް ފުރިހަމަ ކުރަންވާނެއެވެ. އަދި މިފަދަ ފަރާތްތައް ހޮވުމުގައި ތިރީގައި ބަޔާންކޮށްފައިވާ ކަންކަމަށް ރިޢާޔަތް ކުރަންވާނެއެވެ.
- ދަނޑުވެރިކަމަށް އެދި ހުށައަޅާ ފަރާތުގެ ދަނޑުވެރިކަމުގެ ތަޖުރިބާ.
- ދަނޑުވެރިކަން ކުރުމަށް މިހާތަނަށް ކޮށްފައިވާ އިންވެސްޓްމެންޓް.
- ދަނޑުވެރިކަން ފުޅާކުރުމަށް ކޮށްފައި ނުވަތަ ކުރުމަށް ރާވާފައިވާ ކަންކަމުގެ ތަފްޞީލް.
- ދެމެހެއްޓެނިވި އަދި ތިމާވެއްޓާ ރައްޓެހި ދަނޑުވެރިކަން ކުރުމަށް އިންވެސްޓްކުރާ ޓެކްނޮލޮޖީ.
- ޒަމާނީ / ދެމެހެއްޓެނިވި ދަނޑުވެރިކަން ކުރުމަށް ހުށައަޅާ ގޮތްތައް.
- ވަޒިފާ އިތުރުވެގެންދާނެ މިންވަރު ނުވަތަ އާންމު މުޖުތަމަޢަށް ލިބިގެންދާނެ ފައިދާ.
- ދަނޑުބިން ހޯދުމަށް އެދި ހުށައަޅާ ފޯރމާއެކު ހުށައަޅާ ޕްރޮޕޯސަލްގެ ފެންވަރު.
ދަނޑުބިމާއި، ދަނޑުވެރިކަން ކުރުން
- އެގްރި ދަނޑު ނޮޅާ ސާފުކުރުމުގައި، ޖެހިގެންހުރި ދަނޑުވެރިޔާއަށް ގެއްލުމެއް ވާނެފަދަ ކަމެއްކޮށްގެން ނުވާނެއެވެ. މިގޮތުން ދަނޑު އެންދުންދަފަ ކަމެއް ކުރަންވާނީ، ޖެހިގެން އޮންނަ ދަނޑަށް ގެއްލުންނުވާނެކަން ޔަޤީންކުރުމަށް ފަހުއެވެ. މިކަންކުރާނީ ދަނޑުވެރިންގެ މެދުގައި މަސްވަރާކޮށް، ކައުންސިލަށް އެންގުމަށްފަހު ހުއްދަ ހޯދައިގެންނެވެ.
- ދަނޑުވެރިކަމަށް ދޫކުރާ ބިމުގައި އެއްވެސް ބާވަތެއްގެ ގަހެއް 30 އިންޗިއަށްވުރެ ފުނަށް ވަޅުކޮނެގެން އިންދައިގެން ނުވާނެއެވެ.
- އެގްރި ދަނޑުގެ ބިންގަނޑަށް ދާއިމީ ގެއްލުމެއް ލިބިދާނެފަދަ އެއްވެސް ކެމިކަލް އެއް ބޭނުންކޮށްގެން ނުވާނެއެވެ.
- ދަނޑުބިމުގައި އެއްވެސް ބާވަތެއްގެ ޢިމާރާތެއް ކުރަންވާނީ ކައުންސިލްގެ ހުއްދަ ލިބިގެންނެވެ. މީގެ ތެރޭގައި، ސިމެންތި އަދި ކޮންކްރީޓް އެންމެހާ މަސައްކަތް ހިމެނިގެންވެއެވެ.
- ދަނޑު ނޮޅާ ސާފުކޮށް، ރައްޔިތުންނަށް އަދި ޖެހިގެން އޮންނަ ދަނޑަށް ގެއްލުމެއް ނުވާނެހެން އެގްރިދަނޑު ބަލަހައްޓަންވާނެއެވެ.
- ދަނޑިވެރިކަން ކުރުމުގައި ރާއްޖޭގައި ހެދިފައިވާ ޤާނޫނުތަކާ ޤަވާޢިދުތަކާ ޚިލާފު އެއްވެސް، ބޭހެއް، ކާނާއެއް ބޭނުންކޮށްގެން ނުވާނެއެވެ.
- އެގްރި ދަނޑުގައި ހައްދާފައިވާ ގަސްތަކުގެ ސަބަބުން އެހެން ދަނޑުތަކަށް ބަލި ފެތުރުން ކޮންޓްރޯލް ކުރުމަށްޓަކައި، ބަލި ޖެހިފައިވާ ގަސްތަކަށް ބޭސް ޖަހާ ރަނގަޅަށް ބަލަހައްޓަންވާނެއެވެ. ބޭސްޖެހުމުންވެސް ރަނގަޅު ނުވާނަމަ އެބައްޔެއް ކޮންޓްރޯލް ކުރުމަށްޓަކައި ނުވަތަ އެހެން ދަނޑުވެރިންނަށް ލިބިދާނެ ގެއްލުމަކަށްޓަކައި، ބަލި ޖެހިފައިވާ ގަސްތައް ނައްތާލުމުގެ ބާރު ކައުންސިލަށް ލިބިގެންވެއެވެ.
- އެގްރިދަނޑުގައި ދަނޑުވެރިކަން ނުކުރާނަމަ، ނުވަތަ ”ޅޮހީ އެގްރިދަނޑު ދޫކުރުމުގެ ޤަވާޢިދުގެ“ ދަށުން އެކަށީގެންވާ ގޮތުގައި ދަނޑު ނުހައްދާނަމަ، ދަނޑުވެރިޔާއަށް ދޫކޮށްފައިވާ ދަނޑު ކައުންސިލަށް ނެގޭނެއެވެ. މި ފަދަހާލައްގައި ދަނޑުވެރިޔާއަތުން ބިން ކައުންސިލައް ނެގޭނީ ތިރީގައިވާ ކަންތައްތަކަށް ރިޢާޔަތް ކޮށްފައެވެ.
- ގަސްތަކަށް ބޭނުންވާ ކާނާއާއި، ބޭސް ނުދީ ގަސްތައްކަށް އަޅާނުލާ ދޫކޮށްލާފައިބެހެއްޓުން.
- ގަސްހެދެން އެކަށޭނެ ގޮތަކަށް ދަނޑުބިން ވިނަނޮޅާ ސާފުކޮށް ނުބެލެއްހެއްޓުން.
- ދަނޑުގައި ހައްދާފައިވާ ގަސްތަކުގެ %50 އަށް ބަލިޖެހި، އެބަލި ކޮންޓްރޯލް ނުކުރެވިއްޖެ ހާލަތެއްގައި، އެގަސްތައް ނާތައްލުމަށް ކައުންސިލުން އެންގުމަށްފަހު އެގަސްތައް ނައްތާނުލައިފިނަމަ އެ ދަނޑެއް ކައުންސިލައް ނެގޭނެއެވެ.
- ދަނޑުގައި މަޤުބޫލުއުޒުރެއްނެތި ގަސްނުއިންދާ 3 މަސްދުވަސްވުން.
- އެއްވެސް ސަބަބަކާހުރެ ދަނޑުބިން ކައުންސިލައް ނަގާހާލަތުގައި، ގެއްލުމުގެ ބަދަލުގެ ގޮތުގައި އެއްވެސް އެއްޗެއް ދަނޑުވެރިޔާއަށް ދޭކަށް ނުޖެހޭނެއެވެ.
- ދަނޑުބިން ދޫކޮށްލާއިރު ދަނޑުގައި ހުންނަ ވަޅުފަދަ ތަންތަނަކީ ކައުންސިލްގެ މިލްކެކެވެ.
- ދަނޑަބިން ދޫކޮށްލަންވާނީ، ދަޑުބިމުގައި އެއްވެސް ކަހަލަ އިމާރާތެއް ކޮށްފައިވާނަމަ، އެ އިމާރާތެއް ރޫޅާ އެ ބިން ސާފުކުރުމަށް ފަހުއެވެ.
- ދަނޑުބިން ދޫކޮށްފައިދާއިރު، ދަނޑުވއެރިކަން ކުރުމުގެ ތެރެއިން އުފެދިފައިވާ ކުނި، ކުނި މެނޭޖްކުރުމުގެ އުސޫލުގެ ދަށުން ނައްތާލަންވާނީ ދަނޑުބިން ކުއްޔަށްނެގި ފަރާތުންނެވެ.
ކުލި ނެގުން
- މި ގަވާއިދުގެ ދަށުން ދޫކުރާ އާންމު ދަނޑުބިމުން ( ކުރުމުއްދަަށް ދޫކުރާ ބިންތައް) މަހަކަށް އަކަފޫޓަކުން 05(ފަހެއް) ލާރީގެ ރޭޓުން ބިމުކުލި ނެގޭނެއެވެ.
- މި ގަވާއިދުގެ ދަށުން ދޫކުރާ ޙާއްޞަ ދަނޑުބިމުން ( ދިގުމުއްދަތަށް ދޫކުރާ ބިންތައް) މަހަކަށް އަކަފޫޓަކުން 10(ދިހައެއް) ލާރީގެ ރޭޓުން ބިމުކުލި ނެގޭނެއެވެ.
ހިޔާލެއް ވިޔަސް، ސުވާލެއް ވިޔަސް …
[wpforms id=“1205″ title=“false“]
